اسم الوصفه: الكحك
مقدم من : جني
كل سنة وانتم طيبين وعيد سعيد يارب عليكم ❣️❣️النهاردة في طريقتين لي الكحك
1 طريقة الكحك اللى سمنته مقدوحة❣️
2طريقة والكحك اللى سمنته البارد ❣️❣️❣️❣️ نقول الطريقة
أولا .الكحك على البارد.
##############
ناعم جدا بيدوب فى البوق دوبان لكن طعم السمن وريحة الكحك والسمسم هادى خالص عامل زى العلب الجاهزة اللى بنجيبها من برة بالظبط
ثانيا. الكحك بالسمنه المقدوحة.
##################
ناعم بس مش نفس درجة نعومة اللى على البارد ماسك نفسه شوية لكن طعم الكحك حكااااية زى طعم كحك الجدات وطعم السمنة باين جدا بالبلدى كدة لية شمخة الصورتين دول هايعرفوكم الفرق الهشة الفاضية دى اللى سمنتها مقدوحة التانية المكبوسة ومقبلظة دى اللى سمنتها على البارد وعندى فى البيت انقسموا نصين جوزى عاجبه اللى على البارد بيقولى زى الجاهز بالظبط وبنتى عاجبها المقدوح بتقولى مش بيلف فى البوق زى التانى وكان تيتة الله يرحمها اللى عملاه
كدة الفرق وضح
اولا .طريقة الكحك على البارد
#################
كيلو دقيق وذرة ملح وربع كوب سكر بودرة ومعلقتين صغيرين ممسوحين خميرة فورية جافة ومعلقتين صغيرين ممسوحين ريحة كحك ونقلب وننزل عليه بنص كيلو+ربع كوباية(يعنى نص كيلو بزيادة معلقتين) زبدة صفراء نيوزلاندى طرية بدرجة حرارة الغرفة وباديكى وتدعكى كل دة مع بعض وتلمى العجينة بنص كوب صغير حليب دافى وليس ساخن نص كوباية صغيرة بس ما تزوديش عن كدة وتلمى العجين وما تلتيش وتعجنى يعنى لم بس وتقطعى وتشكلى على طول وترصيها فى صاج مفروش ورقة زبدة ونسيبها ساعة ونص تخمر مش اكتر من كدة ونسوى على طول والنتيجة كحك دايب دوبان مفيش زيه ابدا والله اجمد من الجاهز بتاع اكبر المحلات وعيد سعيد
ثانيا .الكحك بالسمن المقدوح او الزبدة المقدوحة
الكحك الناعم الخطير
#########################
كيلو دقيق ومعلقتين سكر بودرة ومعلقة كبيرة سمسم ونص معلقة صغيرة بكنج بودر وذرة ملح ومعلقة صغيرة ريحة كحك ونقلب ونركنه على جنب
ندوب معلقة خميرة فورية مع معلقتين صغيرين سكر فى نص كوب حليب دافى وليس ساخن ونركنه على جنب يتفاعل ونكون مجهزين ربع كوب حليب كمان على جنب لو احتجناه وغالبا مش هانحتاجه لاننا بنحاول مايكنش فى سائل كتير لان لو فى سائل كتير الكحك مش هيكون ناعم
نقدح نص كيلو سمن او زيدى صفراء نيوزلاندى على النار ونصبه فوق الدقيق ودا سر ريحة الكحك المطرقع لان السمن البلدى المقدوح هوه دة اللى بيظهر ريحة الكحك وبيحمص السمسم ويدى للكحك طعمه المميز ونقلب بمعلقة خشب لحد ما السمن يختفى فى الدقيق ونفضل نقلب بالمعلقة الخشب لحد ما الحرارة العالية تختفى ونشيل المعلقة وندعك بادينا باة وبعد ما يبرد يبقى يا دوب دافى بس ننزل بالخميرة بالحليب المتفاعلة ونلم العجين بادينا يا دوب لم بس من غير عجن شديد مش عاوزنها تتحول لعجينة ليها عرق وتطرى وتبقى قرص كدة مش صح يبقى يا دوب لم فقط بحرف صوابعنا بس ولو مش لمت وكانت مفتتة نضيف معلقة حليب واحدة بس ونلم العجين بس كدة ونغطيها عشر دقايق ترتاح شوية ونقطعها ونشكلها على طول ونرصها فى صاج مفروش ورقة زبدة ونسيبها ساعة زمن تخمر مش اكتر من ساعة ساعة ونص ونخبز على طول علشان الكحك ما يشققش وتتخبز على درجة حرارة 180:200 درجة ونخرجها قبل ما يحمر اوى يعنى يا دوب يستوى وما يشقرش مش عاوزينه ذهبى لا عاوزينه بيچ فاتح يميل للاشقر بس مش اشقر ونسيبه يبرد ونرشه بالسكر بجد هاتلاقوه دايب دوبان مش مستحمل يتقطم وبالف هنا وشفا وعيد سعيد علينا وعليكم يارب
وبالف هنا 💖💕❣️💕❣️❣️❣️
ليست هناك تعليقات:
إرسال تعليق