السلام عليكم
موضوع اليوم هو حاجه مهمه جدا بنقابلها وهنقابلها ومش هنبطل نقابلها وهى ياجماعه الطفل الزنان 🤣 ايووون هو الاسم زى ماقريته بالظبط كدا او بالبلدى الطفل الرخم ال مش بيبطل زن باختصار كدا عاوزين نعرف نتعامل ازاى مع الطفل دا وبذكاء شوفو اول حاجه لازم نعرفها عن الطفل الزنان دى حاجتين انه ذكى جدا وعارف الأوقات ال بيزن فيها وعلى الأكثر بيكون قدام ضيوف او فى شارع قدام الناس و تانى حاجه بقا ودى عند الأغلب من الأطفال عنده صبر ومش بيزهق انه يفضل يعيط ويقرفك فى عيشتك ليل نهار لحد ماتعملو ال هو عاوزو يعنى هتعمل هبطل زن مش هتعمل قابل بقا 🤣 طيب ياجماعه سببه ايه دا باختصار كدا الدلع الزياده بيولد زن وكمان القسوة الزياده بردو بتولد زن طب نعمل ايه هقولك تعمل ايه اول حاجه العقاب ازاى ؟؟؟؟؟ بنبدأ بالتجاهل التام لحد مايتعود انه يطلب الحاجه بطريقه مؤدبة ومن غير زن
ملحوظه مهمه
لازم نعرف ان التجاهل نفسه له فنيات كتير يعنى ايه يعنى ممكن أتجاهل الطفل وانا مش باصص عليه خالص يزن مكانه وانت أو انتى فى نفس المكان بس تتعمد متبصلوش
وفى تجاهل تانى وهو قدامك وجها لوجه وانت باصص فى عينه لكن فى صمت تام ونظرك معلق بيه وتتعمد يشوفك وانت بتبص عليه وانت ساكت تماما
وفى كلتا الحالتين طول الوقت أو قصر هيسكت هيسكت متقلقش من دا ومتملش منه
و تانى حاجه بقا وهى أهم حاجه فى العقاب الصبر ثم الصبر ثم الصبر فى العقاب دا ليه بقا لأن ابنك ذكى جدا وهيختبر قوة تحملك وصبرك فى عقابك فلو استسلمت بسهوله خلاص انتهى الامر ومش هتعرف تسيطر بعد كدا حتى لو رجعت تعمل دا تانى لأنه خلاص كسر دا معاك مرة
الخلاصه
ربنا عز وجل بيقول فى القرأن
وكذلك جعلناكم أمة وسطا
خليكم وسطيين فى التعامل لا دلع زياده ولا قسوة وخليك قدوة لولادك وعلى فكرة كل حاجه بتعملها قدام ولادك بيقلدوها بالحرف خلى بالك وخليك قدوة حسنه من البدايه
دمتم سعداء فى حياتكم
شيماء حجاج
ليست هناك تعليقات:
إرسال تعليق