فرط الحركه وصعوبة الإنتباه
موضوع اليوم عن فرط الحركه ال هو النشاط الزائد ونقص الإنتباه
قبل أى شئ لازم نفرق بين حاجتين الطفل الشقى و الطفل ال بيعانى من فرط الحركه
فى فرق شاسع ياجماعه بين الاتنين اكثر الأباء يلاقى ابنه او بنته شقى جدا يقول ابنى عنده فرط حركه طب عرفت منين اصله بيتحرك كتير 🤣 طيب كشفت عليه عند مختص لأ حد عمله مقياس فرط حركه لأ طب هو طول الوقت كدا حتى أثناء نومه لأ لمجرد ان الطفل شقى يبقا عنده نشاط زائد غلط ياجماعه الفرق بين الطفل الشقى وال عنده فرط حركه هو الإنتباة والتركيز ممكن يكون شقى جدا بس ذكى جدا لكن فرط الحركه دايما مصاحب بنقص انتباة وتركيز
تعالو بقا نعرف يعنى ايه ابنى عنده فرط حركه
فرط الحركه
هو إضطراب عصبى نفسي بيصيب الأطفال والبالغين أيضا وبيأثر عالنمو الطبيعى للشخص المصاب بيه وكمان كتير جدا بيبقا عنده قلق واكتئاب
ولازم نعرف إن فرط الحركه مصاحب دايما بنقص انتباه واندفاعيه واعراضه كتيرة جدا وهنعرفها بسهولة
منها إن الطفل بيكون نسبة التحصيل الدراسي بتاعته ضئيله للغايه لأنه أصلا طول الوقت عنده قله انتباة وتركيز يعنى عنده صعوبات تعلم
وطبعا زى ماقلنا الإندفاعيه فى كل شئ وبصورة مبالغ فيها احيانا وممكن توصل للعدوانيه
ومن اعراضه كمان انه ملول جدا ومش بيحب يكمل المهام ال مطلوبة منه طبعا الا اذا كان بيحب الحاجه المطلوبة منه وهقولكو ازاى بعد شوية
كمان بيتسم إنه مزاجى جدا وعنده ضعف فى ضبط النفس ومش بيعرف يتعامل مع المواقف الضاغطه عليه
وطبعا بيبقا أوقات عدوانى
طيب البالغين
بيبقوا فى قلق وتوتر واكتئاب وممكن يصابو بحوادث كثيرة أثناء القياده وطبعا لا ينصح بيها ليهم مشاكل قانونية ممكن يقابلوها بسبب الاندفاعيه
علاقاتهم غير مستقرة
ضعف شخصيه أوقات محاولات انتحار وطبعا كتير جدا بيبقا عندهم بطاله بسبب سوء التصرف واوقات ضعف الأداء فى الدراسه أو العمل
نيجى بقا للجانب الحلو لهذا الإضطراب جميع الأطفال ال لديهم فرط حركه عنده قدرات ولازم تكتشفها فيه عشان تقدر تستغلها لأنها على حسب ميول الطفل ممكن مثلا تشركه فى فنون قتاليه او فنون موسيقيه او رسم على حسب ميول الطفل
طيب أسبابه إيه
لا يوجد سبب محدد ليه ممكن وراثى وممكن بيئي انه اتعرض مثلا لبعض المواد الخطرة ال بتعمل اضطراب عصبى زى الرصاص
وممكن مشكلات فى النمو بسبب الجهاز العصبى المركزى للطفل
طيب يتشخص ازاى طبعا عن طريق مختص لازم مختص ياجماعه لأن اكتر الفحوصات مش بتأكد الإصابه ممكن فحص بدنى مع معرفه التاريخ الطبى للعائله مع مقاييس اختبار النشاط الزائد ونقص الإنتباه دا كله ممكن يشخص الطفل لأن فى حالات كتير مشابهه لفرط الحركه زى الناس ال عندها اضطرابات نوم ومشاكل فى الغده الدرقيه بيبقا عندهم نشاط زائد فا بيتشابهوا اوقات ولكن ليس من الضرورى انه يكون فرط حركه
طرق العلاج
فى طرق علاج كتيرة جدا لفرط الحركه ونقص الإنتباه
منها العقارات والعقارات التى تستخدم نوعين منها نوع ممكن يسبب مشاكل ادمان نوع معين
ومنها ال بيستخدم بتكون كفائته قليله شوية وبتظهر النتائج بعد أسابيع من استخدامه ودا أفضل طبعا
أما عن الأسلوب الأفضل للعلاج اننا نتبع الإرشادات من ثلاث جوانب
علاج نفسي وعلاج سلوكى وعلاج عائلى يعنى لازم النعابجه تتم من المجموعات دى استشارى نفسي وعصبى ومعلمين المدرسه والعائله وخصوصا العائله لأن لها دور أساسي فى العلاج وتدخلها بيبقا أفضل بكتير للطفل وبيساعده جدا
العلاج السلوكى لفرط الحركه فهو أفضل شئ ممكن تستخدمه لأنك بتستخدم معاه مهارات معينه تنظمله سلوكه وتساعده على تغيير السلبيات ال بيواجهها وازاى يقدر يسيطر على اندفاعيته والتحكم فيها
وفى علاج أيضا بيساعد على تقليل النشاط الزائد وأغلب الأباء والأمهات مش بيرضوا يستخدموه وهو الحميه الغذائيه ياجماعه يعنى تمنع الطفل من تناول الأطعمه التى تسبب نشاط مثل السكريات الكافيين زى المواد ال فيها جلوتين وكازين زى الألبان والجبن والقمح بأنواعه إلا طبعا ال مش موجود فيه البروتين دا وممكن يتسبب فى حساسيه للطفل
وطبعا هنبدل بفواكه وحاجات أفيد للطفل
وأخيرا وليس أخرا الوقايه
لازم نحاول نقلل الضرر ال بيسبب الإضطرابات دى
الأمهات والأباء المدخنين الكحوليات أى شئ من دا مضر بالجنين يجب الامتناع عنه
حماية الطفل من التعرض للمواد السامه
تنظيم حياة الطفل اوقات النوم والإستيقاظ أوقات اللعب
الإهتمام بالطفل وقت التحدث معاه يعنى أثناء التحدث لا تنشغل أو تنشغلى بعمل ما يجب تواصل بصرى
التدخل المبكر للعلاج
التعاون مع الأخصائين أو الطبيب والمعلمين فى المدرسه يجب التعاون ما بينهم
الوقايه خير من العلاج
دمتم سالمين أنتم وأبنائكم
شيماء حجاج
ليست هناك تعليقات:
إرسال تعليق