طريقة عمل تورتايه

طريقة عمل تورتايه 
مقدم من / رانيا عبد الحليل
حبايبى أعملوا الخطوات بالظبط وان شاء تطلع أحلى من الجاهزه
المكونات: نص كيلو سبونج تورتة (دقيق تورته) /6بيضات/معلقة كبيرة محسن جل/فانليا/معلقة خل /مج شاة عادى ربعه لبن وكملى ماء
الطريقه:
نجهز نصيه مقاس 24 ندهنها زيت ونبطنها بالدقيق أو ورق الزبده أن أمكن
فى المضرب الكهربائى ننزل البيض والفانليا والخل ونضرب حوالى 5دقايق وبعدين ننزل المحسن ونستمر فى الضرب لغاية ميرتفع كويس معانا وبعدين نضيف مج اللبن بالماء ونبدأ فى تنزيل الدقيق بالتدريج ونستمر بالمضرب حوالى 15دقيقه متواصله طبعا فى نفس الاتجاه لو المضرب يدوى
ويكون الفرن ساااخن جداا ننزل الخليط فى الصنيه بدون هز للصنيه وندخلها الفرن على درجة حرارة 200 عشر دقايق ونهدى على 180 وتفضل حوالى 45 دقيقه طبعا منحاولش نفتح الفرن خالص غير بعد 45 دقيقه وفتح بسيط جدا نجرب بخلة أسنان اذا استوت تمام نطفى الفرن ونفتح جزء بسيط بالتدريج علشان متهبطش دقايق تهدى ونقلبها تبرد وطبعا يفضل تبات ليله قبل التزين أن امكن

التزيين :
نقشر الوجه ونقطع الكيك أربع طبقات أو 3 حسب المتاح
نأخذ اول جزء من تحت ونسقيه خفيف لبن سااقع بالمعلقه ونحط طبقة كريمه واى حشو ممكن موز أو شيكولاته مبشورة أو مكسرات ونضع الطبقه الثانيه بنفس الطريقه والثالثه فى اخر طبقه نقى لبن بسيط بالمعلقه ونضع كميه مناسبه من الكريمه لتغليف التورتة كامله وبعدين نزين الوجه بالكمبوت أو الفواكه المتاحه أو بالشيكولاته والكريمه على حسب الرغبه وفى التلاجه ساعتين
وألف هنا (معلش طولت عليكم يارب أكون افدتكم)
رئيسه قسم فتافيت السكر لموقع واذاعه اخبار العرب الشيف / ايمان شلبي