مقدم من ندى العسال
ليه احتياجاتنا النفسية بتوجعنا اوى و هل فيه حل لتسكين هذا الوجع ؟
احتياجاتنا النفسية عاملة بالظبط زى المواد الغذائية الى احنا بناكلها
اى نقص فى أحد العناصر الغذائية المهمة ممكن يسبب امراض بالطبع
يعنى مثلا جسمنا محتاج بروتين
فاحنا ممكن ناخد البروتين دا من مصادر متعددة
من اللحوم و الاسماك و البيض و الاجبان و الالبان و البقوليات
و النقص الشديد فى البروتين بيعمل امراض تغذية عديدة
بس احنا عندنا مشكلة
ساعات كتيييير اوى بنتربس مخنا على مصدر واحد بس للبروتين و لو ما اكلتوش تبقى مأساة
يعنى مثلا واحد عنده النقرس و الدكاترة قالوله متاكلش لحوم حمراء
فيفضل عايش فى ازمة رهيبة انه مش بياكل اللحوم
و حاسس بنقص البروتين و ممكن يحس كمان باعراض مرضية ويقولك دا من نقص البروتين
مع ان البروتين له مصادر تانية كتييييرة اوى
بس هو واهم نفسه انه عنده نقص
زى الى نفسها فى كلمة حلوة من جوزها
مع انها متأكدة من حبه ليها
و بيعبر عن الحب دا بكل الوسائل الاخرى
بس هى متربسة على اللحمة الحمراء
و محسسة نفسها بنقص الحب
و ساعات برده بنتربس على شخص واحد بس
زى واحد ناجح فى حياته و كل الى حواليه معجبين بيه
بس ما بيسمعش كلمات الاعجاب دى من مراته فحاسس بالاحباط و الألم ..مع انه شبعان تقدير فعلا من كل الناس
و ساعات برده نجيب لنفسنا النكد باننا نشترط الاحتياج فى موقف معين واحد بس
زى الى يقولى : انا نفسى لما ارجع من الشغل احس انها مشتاقة لى و بتستقبلنى و هى مبسوطة
مع انها ممكن اوى تكون راجعة هى كمان من الشغل و مش قادرة تديك الى انت عايزه فى الموقف دا تحديدا
بس ممكن تعبر عنه فى مواقف تانية كتير بعد ما ترتاح من مسئولياتها
و ساعات كمان بنشترط الحجم او الكم او الكيفية
يعنى لما واحدة تقولى : جوزى بيقولى كلام حلو بس مش بحس انه من قلبه
و الا لما تقولى هو بيجيب الى انا عاوزاه بس و هو محرج او مغصوب
احتياجها متلبى بس مش عاجبها الطريقة
البطة ادامها على الطبق بس مش عاجبها الطبق
و ساعات كمان الجوع الشديييد فترات طويلة مش بيحسسنا بالاشباع مهما شبعنا
يعنى لما واحد يكون عانى من ام قاسية عليه
و مراته من تصرفاتها تبدو حنونة
لكنه من طول الاحتياج حاسس انه مش راضى و مش شبعان
عايز حنية كمان و كمان
جعان حنية و قبول
الانسان ساعات كتير بتكون احتياجاته متلبية فعلا
بس هو الى مش شايف و لا حاسس
او انه عانى كتير من النقص و عايز كتييير لدرجة الشراهة
او انه معندوش الرضا الى يخليه يشوف انه فعلا متلبى منه
بص على احتياجك
و حاول ترضى بالجرعة الى انت بتاخدها بالفعل بدون ما تشترط كيفية او شخص معين او وقت او كم معين
علشان تقدر تحس بالرضا و السعادة
مدير قسم مملكتى من موقع اذاعة اخبار العرب أ. هبة متولى برئاسة أ. حمدى محمد
ليست هناك تعليقات:
إرسال تعليق