الفايش الصعيدي
مقدم من الشيف/أسماء عزاازي
المقادير
اولا
الفايش الصعيدي لازم يمر ب3 خطوات مهمين جدا علشان نوصل للنتيجه النهائيه
اولا
خميره اللبن
بنجيب كوب لبن (حليب) ونغليه واول مايبدأ فى الغليان نطفي عليه ونصبه فى برطمان ازاز محكم الغلق ونضيف معه ملعقه سمسم ونلفه كويس ونشيله فى مكان دافي لمده 24 فى الصيف و3 ايام فى الشتا ونعرف انها نجحت لما نلاقي اللبن فصل وعمل طبقه مجبنه على الوجه
تانيا
بناخد خميره اللبن دي ونضيف عليها 2كوب دقيق وكوب ماء دافيء وملعقة سكر ونقلب الخليط ده كويس اوي هتكون زي عجينه الزلابيه ودي بنغطيها ونشيلها فى مكان دافي حوالي أربع ساعات هنلاقيها خمرت وكونت فقاقيع على الوجه
ثالثا
هنجهز مقادير العجين
لكل كيلو دقيق كوب سمن وملعقة سمسم وملعقة ريحه كحك وملعقه صغيره كركم وملعقة صغيره محلب ونص كوب سكر وربع معلقه صغيره ملح ونص كيلو لبن (حليب)
(الطريقه)
هنحضر اناء واسع وغويط ونصب فيه كل السوائل ونضيف معاهم السكر والملح والسمسم وريحه والكحك والمحلب ونقلب كل المكونات دي كويس مع بعض ونضيف عليهم خميره اللبن اللي جهزناها ونقلب كويس ونضيف الدقيق بالتدريج لغايه مانحصل على عجينه لينه متماسكه ونعجن فيها كويس اوي كل ماتعجني النتيجه هتكون احسن ونغطيها ونسيبها تخمر فى مكان دافي بعد ماتخمر هبطيها وسبيها تخمر مره كمان وبعد ماتخمر تقرصيها فى صواني وتسيبي مسافه بينهم وتسيبيها تخمر نص ساعه فى الصواني وتسويها فى فرن ساخن مسبقا على نار عاليه وبعد التسويه نتركها تبرد وتقطعيها أصابع وتحمصيها على نفس فكرة بسكوت الينسون نار هاديه وبالف هنا وشفا
كتبت بواسطة أم ميدو
ليست هناك تعليقات:
إرسال تعليق