فى حكمه كدا بتقول من أمن العقاب أساء الأدب
من الحكم الجميله ال بناخد بيها في حياتنا وفى حاجات كتير وفى علاقاتنا كمان مع الناس
لكن انا اليوم هتكلم عن عقاب الطفل ودلاله الزائد
شوفوا أى شئ فى الدنيا لما بيزيد عن حده ومش بيتعملوا حدود لازم يكون فى له عواقب كارثيه منها العقاب والدلال ال هو بالبلدى كدا الدلع
ازاى ندلع وازاى نعاقب ولادنا ياجماعه
العقاب الزائد وبأشياء مهينه زى الضرب بالألم والضرب المبرح والأشياء ال بتسبب أثر عموما بلاشها
أنواع العقاب فى تعديل سلوك إبنك أو بنتك خد منها ال يمشي مع ابنك وطبيعته وطبيعه تربيتك له لأن قبل أى شئ طبيعة تربيتك انت أو انتى هى ال بتفرض عليك طبع ابنك أو بنتك
والعقاب نوعين ياجماعه
ايجابى وسلبى
ايجابى يعنى ممكن ابنك يكون بيعمل سلوك معين وفى نهايه اليوم لو معملوش تعززة وتشكرة كمان وتقولو انا مبسوط منك جدا انك معملتش دا النهاردا عشان كدا هتاخد مكافأه دا هيخليه يتحمل مسؤوليه ومايكررش الخطأ
سلبى إنك لما يعمل السلوك تعاقبه بحرمان من أى شئ هو بيعملو وحابه فى الوقت دا
طبعا دى أمثله بسيطه جدا وتوضيح بسيط على النوعين لأن فى تحت العقاب الإيجابى مليون أسلوب والسلبي كذلك لكن تربيتنا لولادنا هى ال بتحتم علينا ازاى نعاقبهم
طيب نتعامل ازاى فى العموم مع ولادنا
يعنى مثلا إبنك عمل سلوك خاطئ متضربوش بالعكس انت ممكن تجاهله تماما لأنه ببساطه ممكن يكون بيعمل دا عشان يدايقك فانت بتعمل دا بتوصلوا لإنه يبقا عارف انه مهما عمل مشمهم يبقا السلوك هيبطل يعمله لما يلاقيك بتتجاهله
طيب انا ابنى لما بتجاهله بيزيد يبقا متتجاهلوش واتعامل مباشر معاه مثلا احرمه منى أى شئ محبب
خليه قاعد قدامك وقت معين من غير مايتكلم ك عقاب احرمه من لعبه شاشه أو فون كل دا ممكن تعمله كنترول بيه وخلى بالك دا بردو بيرجع لتربيتكم لأبنائكم مالأول يعنى مفيش حد يبقا مدلع ابنه زياده عن اللزوم ويجى يقول مش بيستجيب عفوا يا أخى الكريم حضرتك دلعته زياده عن اللزوم عشان كدا انت بقيت هوا بالنسبه ليه يعنى اصلا ولا فارق معاه
وكمان العقاب الزياده ياجماعه بيخلى الطفل معرض انه يبقا عدوانى فا خليكم متوازنين مع ولادكم
ملحوظه
فى حاجه مهمه جدا ياجماعه لازم ناخد بالنا منها هى التوقيت للعقاب يعنى مابنفعش اعاقب طفل على حاجه عملها امبارح قبلها بفترة وقتها الطفل مش هيفهم هو عمل ايه الاطفال مش يستوعبوا دا فلازم وقت العقاب يكون وقتى فورا وقت حدوث الخطأ
دا بالنسبه للطفل العادى
أما طفل الأوتيزم فا أنواع العقاب معاه كتير جدا وبنستخدم معاه استراتيجيات تعديل السلوك ودا هنخليه فى موضوع لوحده إن شاء الله
نيجى بقا للدلال الزائد
الدلع الزياده بيعمل حاجه من اتنين يااما يطلع طفل ضعيف الشخصيه ملوش رأي
ياإما طفل أنانى لدرجه انه حتى مش هيعمل اعتبار لأمه ولا لأبوة
دا غير كمان إنه لا هيتحمل مسؤليه لا فى الشخصيه دى ولا دى
فا خليكو متوازنين ياجماعه لا دلع زياده ولا عقاب شديد الاتنين بيؤدو لنفس الشخصيات طفل مهزوز وضعيف او طفل انانى أو طفل عدوانى جدا ويعوض كل ال انتوا بتعملوه فيه سواء جوا البيت أو برا البيت
بسم الله الرحمن الرحيم
وكذلك جعلناكم أمة وسطا
خليكم متوازنين ووسطيين فى معاملتكم لولادكم
شيماء حجاج
ليست هناك تعليقات:
إرسال تعليق