خرس الأزواج
بسم الله الرحمن الرحيم
ومن أياته أن خلق لكم من أنفسكم أزواجا لتسكنوا إليها وجعل بينكم مودة ورحمه إن فى ذلك لأيات لقوم يتفكرون
تعرفو يعنى إيه أزواجا لتسكنوا إليها
تعرفوا يعنى إيه سكن طب تعرفوا يعنى إيه موده ورحمه
طبعا السكن هنا يعنى الطمأنينه الأمان الثقه الألفه تخيل كدا معايا يبقا عندك كل دا فى إنسان عايش معاك تعالو نكلم النهاردا عن ما يقال فى عصرنا هذا النكد الزوجى الذى يؤدى الى الخرس الزوجى يعنى ايه خرس زوجى ياجماعه يعنى اتنين عايشين مع بعض بلا هدف اتنين عايشين مع بعض لمجرد الأكل والشرب وأوقات الأولاد فقط أخى وأختى الكرام ليه النكد لا بجد ليه
عشان الفلوس ولا عشان مش عارفين تتأقلموا سوا ولا عشان مش بتحبوا بعض ولاقيتو اختلافات كتير بينكم حاجات كتير جدا لا تعد ولا تحصى من أسباب النكد والعيشه الغير سويه بين الأزواج
أكلمك ياأخى الكريم والفاضل أولا
تعرف إن كلمة شكر منك لزوجتك بتفرق معاها أوى على أى شئ ولو كان بسيط طب تعرف إن الشكر دا أوقات بيلجمها من نحيتك لأنها ببساطه لما تسمع منك كلمه شكر حلوة على أى حاجه مش هتلاقى حاجه تنكد عليك بيها طب تعرف إنك لما تدخل من برا بدل متقولها انا مخنوق من الشغل وفى كذا وفى كذا ممكن تقولها انا عاوز احكيلك على مشاكلى فى شغلى اليوم أو أيا كانت الطريفه ال بتعرف تحكى معاها بيها بكل هدوء صدقنى هتهون عليك كتير جدا ولما تسمعها دا أفضل من إنك تقعد مكشر وزهقان جوا بيتك إل المفروض إن هو السكن بتاعك
طب إيه رأيك لو فكرت تخرج معاها خروجه ولو بسيطه بعيد عن البيت وبعيد عن الأقارب تتمشوا وتكلموا سوا وانتو إيدكم فى إيد بعض هتفرق كتير ولو فى إمكانيه إنك تغديها أو تعشيها برا ولو شئ بسيط كل فترة وتقولها عاوز أريحك من شغل البيت النهاردا عارف هتقدرك إزاى حتى لو فيكم تعب إيه حتى طب عارف إنك لو مبطلتش تعبرلها عن حبك لها بأى طريقه دا بيفرق معاها فى أزواج كتير أوى مجرد ما يتزوجو خلاص مبقاش فى كلام حب هقولها ليه ماهى خلاص بقت ليا موجوده فى أى وقت مفيش شكر مفيش تقدير ولا حتى مشاعر كل دا فى النهايه بيؤدى للخرس الزوجى موضوعنا اليوم
بتبقا عايش بتقضي يومك وخلاص بروتبن بحت مفيش مفر منه
ممكن أكلم أختى الجميله ثانيا
ليه ياأختى الفاضله مش بتقدرى زوجك وتعبه تعرفى إنك لو عودتيه أول مايدخل من الباب إنه يلاقى الراحه النفسيه فى بيته هتفرق معاه طب جربى كدا تقابليه بإبتسامه جميله تعرفى إنه حتى لو ناوى على نكد هيتكسف منك لو مكشر ولاقاكى بتضحكى هيتكسف بجد منك عارفه ليه لإن الإبتسامه فى وجه أخيك صدقه طب ما بالك بزوجك بقا طيب مهو دايما يجى مكشر اضحك ليه بقا ؟ ياستى مرة فى مرة هيحس وهيعرف ويكسف منك وهتلاقيه هو كمان بيحكيلك على مشاكله وهو مرتاح
أوقات لما يقولك حاجه عليه او على غيرة خليكى سره مش تكلمى مع ماما والجيران وهكذا هيثق فيكى ازاى بعد كدا أحفظى سر زوجك لإنك إنتى مصدر الثقه والأمان ليه
ليه لما يجى يقولك نخرج تقليله تعبانه مشغولة ياستى أخرجى هو عاوز يخرج معاكى انتى عاوز يحس بحاجه معاكى إنتى على فكرة دا هيفرق معاكى جدا انتى كمان التغيير مطلوب
وبعدين تعالى هنا انتى ليه نكديه كدا كل ما يحصل حاجه فورا تروحى تتصلى ولا اول مايدخل مالباب تجرى وتحكيله ياستى اصبرى خلى فى وقت للحكى عن المشاكل دا هو كمان برا أوقات كتير بيشوف زيك اصبرى للوقت المناسب واحكى وهتلاقيه بيسمعك مش بقولك متحكيش بقولك اختارى وقت صح
ليه لما بيجبلك حاجه بسيطه بتقوليله (ياما جاب الغراب لأمه ) طب دا كلام دنتى لو قلتيله تسلملى وربنا ما يحرمنى منك هتكونى عنده بالدنيا كلمة الشكر بتفرق أوى ياجماعه
إيه رأيكم لما تعملو لنفسكم يوم كل فترة تطلعو فيه من جلد الأزواج وتلبسوا جلد الصحاب يوم كل فترة تخرجوا مع بعض وكل واحد يحكى للتانى إيه ال تعبوا سواء من الطرف التانى أو عموما المهم تتكلموا وتفضوا كل المشاحنات ال بينكم وترجعوا لبيتكم من غير أى حاجه جواكم غير الموده والرحمه صدقونى هتفرق كتير
اللين والموده والرحمه والتقدير بينكم هيخليكوا تعملوا المستحيل سوا وتعدوا كل صعب
وأخيرا أحب أقولكم الخلاصه
فى حاجه لازم منتسرعش فيها وهى الإختيار الصح مش عشان هى حلوة تبقا حلوة الصفات مش عشان هو فقير يبقا ماينفعكيش مش عشان هى فيها حاجه وحده انت متردد عشان عشانها مش عجباك فيها تبقا مش هى المناسبه مش عشان هو مظهرة العام كويس يبقا هو كويس ممكن يبقوا من برا شكل ومن جوا فاضيين أوى
إختاروا صح
بطلى نكد ياجميلة الجميلات
بطل نكد يا سيد المحترمين
شيماء حجاج
