الطلاق
موضوع اليوم من أهم المواضيع ال قابلناها وبنقابلها وهنقابلها كل يوم
عديد من المشاكل ال بيقابلها الأزواج والزوجات بتسبب الطلاق لكن هل سألنا نفسنا ليه بقت أقل المشكلات وأتفه الأسباب بتؤدى للطلاق خلينا نتفق الأول إن العوامل التربوية فى شخصيه الطرفين هى أساس دا شخصيات غير سوية من تربية لنشأه فى البيوت دلع وعدم تحمل مسؤولية الكذب أحيانا الأنانية والإستهتار بالأخرين حب التملك وخروج الأسرار من داخل الطرفين الشخصيه الضعيفه قدام الأهل أو القرارات ال مش بيقدر ياخد موقف تدخل الأهل سواء بالإيجاب أو السلب وكلو كوم ودى لوحدها كوم ساعات الدنيا بتبقا ماشيه كويس ويجى حد مالأهل بكلمه حتى من غير مشاكل الدنيا تتقلب رأسا على عقب
طب دا كلو منين من البعد عن الدين والشرع و التربية الخطأ من البدايه
الطرفين أقل شئ يحصل يا هى تجرى على أهلها ياهو يبقا بيحكى لأهله كل تفصيله بتدور مابينهم يا أما سوء تقدير للمشكله حاجات كتير جدا بتتسبب فى الخروج على السيطرة فى الزواج طب منعلم ولادنا من البدايه الصح والغلط الإحترام والتقدير وتحمل المسؤليه
للأسف فى كتير أوى من البنات والشباب دلوقتى كلمة الطلاق والخلع عندهم بقت أسهل مايمكن وكمان بيبقوا عندهم أولاد يعنى حتى مش بيراعو ولادهم
طيب هل الطلاق أصلا شئ كويس ولا لأ الإجابه
على حسب
يعنى إيه
يعنى فى إعتبارات كتيرة أوى لازم نضعها فى الحسبان واحنا بنفكر فى الطلاق هل المشكله دى تستاهل طب الطرف التانى خطأه يستاهل انى اوصل لدا مع الأسف أكثر المشاكل فى الوقت الحالى ناتجه من دا وهو الإختيار الخطأ سواء للشاب أو الفتاه وكمان المشاكل بتبقا تافهه جدا وبردو بيطلبو الطلاق
يعنى مثلا طرف إختار التانى عشان كذا ميزة فيه تمام طب شفت عيوبه هل تقدر تتعايش مع العيوب دى مهو فى عيوب تتقبل وعيوب لأ والمظاهر دايما بتخدع طرف من الطرفين بس معلش فى حاجات لازم تبان مفيهاش فصال وخصوصا ان فى فترات خطوبة طيب والناس ال بتتجوز علطول اقولهم عالأقل فترة خطوبة قليله تتعاملوا وتشوفوا بعض ازاى مفيش حد بيقدر يخبى كل حاجه عنك الا إذا كنت انت عاوز تخبيها أصلا وتتغاضي عنها عشان الكم ميزة ال انت اخترت الطرف دا بناء عليه أولا مفيش حد كامل لكن فى شخصيات محترمه فيها عيوب تقدر تتقبلها وتتعايش معاها لأ كمان فى شخصيات بتحاول تغير من العيوب دى فى نفسها عشانك انت لكن للأسف الإختيار دلوقتى بناء على مظهر فارغ بيروح مع الوقت وتفضل الحقيقه المرة ال انت اصلا شفتها فى الأول وقلت لنفسك تتغاضي عنها
كمان فى حاجه الأهل بيعملوها وكلمه بتودى ناس ورا الشمس
ألا وهى دا هيتغير بعد الجواز .
دى هتتغير بعد الجواز
ياجماعه ركزوا العيوب الداخليه مش بتتغير الا فى حالات معينه زى ال قلت عليها فوق شخصيات محترمه بتحاول على قدر الممكن انها تقلل من العيوب دى فى نفسها عشان الطرف التانى وطبعا دا مش فى العيوب ال مفيهاش تراجع طبعا لأ فى عيوب تتقبل وعيوب لأ
زى البخل الأنانيه الإستهتار الخيانه إفشاء السر عدم احترام الطرفين لبعض
الإهانه المتكررة وبدون سبب التقليل من شأن الطرف الأخر طبعا فى حاجات من دى لما بيتعمل معاها مواقف فى بداية الحياه الزوجيه بتقل لأنه الطرف لما بياخد موقف فى الأول بيبقا أفضل بكتير جدا من اننا نسيب الدنيا كدا ونقول لا احنا لسه فى الأول وبكرة يتغير الطرف التانى وكدا لأ أكبر خطأ هو دا
الغلط لو اتساب بيتكرر وبيتكرر بطرق مختلفه وتكسر الطرف التانى
وفى مشاكل كتير جدا بتبين جدا ضعف الشخص فى إدارة بيته سواء زوج أو زوجه ودى مشكله تانيه يعنى تبقا الحياه هاديه ومستقرة إلى أن يحدث شئ مايقدروش يواجهوة أو يعدوة لضعف التحمل والقدرة على حمل المسؤولية فا طرف مالاتنين بيتفاجئ من ردة الفعل فا بيحصل الطلاق
وعلى فكرة الطلاق اوقات كتير جدا بيبقا حل فعلى وجذرى لمشاكل كتير بيقابلها الطرفين يعنى بيبقا حل لابد منه وأفضل بكتير من ان حد من الطرفين يبقا عايش مسلوب كل حاجه بمعنى الكلمه وملوش أى دور فى الحياه غير انه يرضى الطرف الأخر بأى شكل عن طريق اهانه بقا ضرب سخريه خيانه المهم ان الطرف الأخر مستمتع بعذابه معاه أصلا
طب والحل
أولا نربى ولادنا صح بالدين والشرع بيسهل كتير أوى ونحملهم مسؤوليات ونعلمهم إن الزواج مش مصالح ومظاهر الزواج حياه واحنا ال بإيدنا نخليها سعيده أو لأ ثانيا نختار صح نشوف إيه العيوب ال تقدر تتقبلها مع شريك حياتك وإيه ال مش هتقدر تتقبله ثالثا المواقف والأفعال فى البدايات وأكرر مرة أخرى البدايات ياجماعه لازم يتوقف عندها ويتعملها عقاب عشان مايتكررش فى حق الطرف التانى دا بيساعد كتير أوى فى تأسيس الحياه بعد كدا
وأخيرا وليس أخرا الإحترام لازم الإحترام ما بين الطرفين والتقدير بيدوبوا كتير أوى مالمشاكل مابين الطرفين
دمتم سالمين
شيماء حجاج
