كتبت عايده السحراوي
اسم الوصفه:محشي كرنب
مقدم من : ناهد ياسين
مده التحضير : 60دقيقه
مده الطهي : 45دقيقه
**********************
اولا طريقه سلق الكرنب. وتقطيعه.
*************************
فى اناء نضغ ماءيغلي علي النار فيه ملح
وكمون وسكر ودي تكه من عندي علشان
ورق الكرنب يبقى مسكر وتكوني شايله
الورق اللي على وش الكرنبه الأخضر
وغسلاها جيدا ومصفياها وغسله ما
يصلح من الورق الخارجي الاخضر لو
بتحبي الورق الاخضر نرجع للإناءبتاع
السليق هنضع الكرنبه ونسحب ورقه
ورقه منها بعد ما يدوب تدبل حتي ما
تخلص الكرنبه كلها ونضعهافي ماء بارد
ونغيرها كذا مره ونغسله جيدا حتي،يبرد
تماما علشان نوقف السوا ولو بتحبي الورق
الاخضر تسلقيه بنفس الطريقه بس تضعيه
كله مره واحده وبسرعه طلعيه بس تتأكدي
انه استوى علشان بياخد وقت اطول من الأبيض .
طريقه عمل تسبك الصلصه .
*********************
بصل مقطع مكعبات صغيره جدا بس
كتير علشان الخلطه تبقى مسكره وفى
وعاء تسخني زيت ذره وتنزلي بالبصل
يادوب يصفر تنزلي عليه بطماطم بيوريه
(صلصة طماطم ) علشان متحمرش جيدا
فهيه هتديله لون وكام تقليبه تنزلي بعصير
الطماطم ويستحسن تكوني غلياه لحد ماينشف
وتبقى شبهه الصلصه علشان البصل بيشيط
بسرعه فبكده مش هتطول علي النار فمش
هتلحق تشيط والخطوه ديه من عندي انا
ولما تتسبك هنضع التوابل فى الاواخر
علشان ريحتها ماتروحش
توابل المحشى.
************
التوابل عباره عن رشه من كل من
ملح
فلفل
نعناع ناشف ناعم
كمون
معلقة ثوم مفروم
رشة سكر علشان التعادل مع
الطماطم والصلصه .
وتقطعي الكرنبه بالحجم اللي انتي عايزاه
وتقلبي الأرز مع التسيبكه والخضره تكون
كتيره شبت وبقدونس وكسبره وتحشي
بحيث يكون الأرز قليل علشان لما بيستوي
بيزيد الحجم واثناء الحشو تكوني غاليه
شوربه يستحسن تكون شوربة بط او فراخ
بلدي اوالمتاح بالنسبه لي عاملاه بشوربة بط
وتسقي حلة المحشي بحيث تكون الشوربه
تحت الصف الاخيرمن الكرنب وتحطي عليه
طبق علشان ما يفكش وتغطيه بغطى الحله
عادى ونضعه على نار عاليه لحد الغليان وبعد
كده وطي النار ع الاخر لحد ما يقرب يستوي
تغلي حوالي كوباية شوربه وفيها شوية صلصه
وسمنه او دسم من على وش الشوربه وترشيها
على حلة الكرنب ولمايستوي تطفي عليه وتكشفي
الحله وبألف هنا وشفا .
ملحوظه .... ماتحطيش صلصه ولا سمنه ولا وش
الشوربه يعني اقصد ولا شوربه دسمه إلا بعد ما
يدخل فى سوى علشان الحاجات ديه بتعطل
السوى...وألف هنا علي قلبكم
