العشم بقلم المدربه شيماء حجاج!

  

كان فى حكمه قديمه أوى دايما بيتقال على العشم الزياده (من تدخل فيما لا يعنيه سمع ما لا يرضيه ) كانو الناس زمان بيقلوها لما يقابلوا موقف من دا او عشم من حد معين 

لكن فى حاجه أحسن من الحكمه دى مليون مرة مش بنعمل بيها خالص 

بسم الله الرحمن الرحيم 

يا أيها الذين أمنوا لا تسألوا عن أشياء إن تبد لكم تسؤكم 

ربنا عز وجل فى القرأن متركش شئ إلا وتحدث عنه ياجماعه 

..عملت ايه لا مفيش ربنا يسهلها بس ياخى قول بقا ولا انت خايف نحسدك 

😶 صمت 

مايمكن مش حابب اقولك ليه تضطرنى انى أقولك ياسيدى مشهقولك مش عاوز اقولك ليه تضطرنى لكدا انى أحرجك ليه ..

مثال بنقابله كل يوم وقيس على دا حاجات كتيرة جدا فى حياتنا 

زمان كانت الناس بتتعشم فى بعض بزياده بس كانوا بيفهموا بعض بردوا مش زى دلوقتى كل واحد حابب يفرض نفسه عالطرف التانى بكل شئ أعمل كذا متعملش كذا والمطلوب من الطرف التانى انه ينصاع لهذة التدخلات 

دلوقتى نشوف العشم وصل لإيه تخيلوا ان مبقاش فى أى حدود مابين الناس فى أى شئ حرفيا مفيش مسافات ولا خطوط حمرا مابين الناس فى أى شئ تخيلوا ان الناس بقت بتقول على عدم مراعاه مشاعر الأخرين والتنمر عليهم عشم 

تخيلوا وصلنا لإيه وصلنا إن كل واحد يتدخل فى خصوصيات التانى وعاوز يعدل حياته على مزاجه ولو معملش دا يبقا فى مشاكل بينهم وكمان يبقا شخص معندوش أى مرونه وصلنا إننا كل أب وأم وأخ واخت يتدخلوا فى حياه ولادهم بطريقه مزرية لدرجه انهم ممكن يتسببوا فى انفصال ومشاكل مابين اولادهم وأزواجهم لا وكمان فى الأحلام ممكن يتدخلوا فى احلامهم وطموحاتهم لدرجه انهم ممكن يقضوا عليهم مستقبلا 

أزاى نعامل بعض بشياكه وحدود ورقى 

ليه نعمل حدود ياجماعه ليه لازم نعمل حدود ماببنا فى أى علاقه سواء صحاب أو اخوات أو حب أو كمان الأم والأب وأبنائهم أو العلاقه الأسمى فى الدنيا وهى الزواج 

ياجماعه لازم الحدود تتعمل تعرفوا لما الصاحب من أول موقف لقى صاحبه أو لاقت صاحبتها غلطت فيها وأهانتها من أول موقف يتحط حد مش هيبقا فى بعدها أى إهانه للطرف التانى وكمان الشخص دا لو هو طبيعتوا كدا اصلا هيبعد وهترتاح من شخص طبعوا انه يهينك 

لو الأخ أو الأخت أو الأب والأم اخدوا منك على انك عامل حدود لحياتك الشخصيه مع زوجتك أو زوجك وإنكم مش فاتحينها مشاع للكل دا يعرف عنك كل حاجه ودى تعرف عنك كل حاجه ويتدخلوا فى كل شئ لا ويقلولكم كمان تعملوا ايه ومتعملوش ايه هيتعلموا يحترموا دا مع الوقت وهيعملوا بيه

فى الزواج تعرفوا ان لازم يكون فى حدود بردو مابين الزوج والزوجه احترامهم لبعض التفاهم مابينهم مش معنى انك بقيتى متزوجه منه يبقا خلاص ملوش أى خصوصية إنه يخرج مع اصحابه أو يقعد مثلا لوحده فى البيت شوية إنه كدا مش بيحبك أو يااما يبقا بيخونك لأ لازم تديلوا مساحته الخاصه بردو عشان الروتبين بيقتل 

ومش كل حاجه تدخل فيها فى حياتها مش معنى انها زوجتك يبقا مفروض عليها إنها تحكيلك عن أهلها كل حاجه مثلا مش شرط أوقات كتير بتبقا مش حابه تحكى عشان لا انت تشيل منهم ولا هم يشيلو منك فى حاجات كتير مابين الزوج والزوجه لازم يتحط فيها حدود ياجماعه مش لازم عشان فى شقتكم حرين سوا فى كل شئ دا يديكم الحق إنكم متعملوش لنفسكم حدود قدام الأهل سواء من اهل الزوج أو أهل الزوجه متديوش فرصه لحد انه يخليكم مشاع وخصوصياتكم تبقا فى العلن 

التعامل من غير حدود بيجعل العلاقات بين أى طرفين فى أى علاقه سيئه جدا لأن خلاص بيبقا كل شئ مباح أى شئ لازم احترام الخصوصيات ياجماعه والحدود فى التعامل لأن دا بيدى فرصه للعلاقات بين الناس تبقا قويه وتطول متبقاش قصيرى عمرها عمر افتراضي ينتهى بأول موقف نقابله 

ماتتخطوش الحدود ياجماعه 

وهرجع أقول تانى كلام ربنا عز وجل 

إن تبد لكم تسؤكم 

شيماء حجاج