سؤال بيجيلي كتير وكل اصحابه بيسألوه وهما بيترعشوا من الخوف !
والسبب اننا بنخاف من التغير وبالذات التغير المبني علي الفقد - فقد ناس او مكان او شغال-
وطبعا الخوف ده بيجبرنا نأجل قرار الانسحاب لوقت طويل بيوصل احيانا لسنين ونصحي فجأه علشان نكتشف ان العمر ضاع .
علشان كده دايما باقول ان فيه علاقات كتير ميته اكلينيكيا بس اصحابها خايفين يشيلو جهاز الاكسوچين علشان مايواجهوش الحقيقه .
-طب والحل ؟
- الحل اننا نفهم امتي لازم ننهي العلاقه بدون خوف او تردد .
مبدأيا لازم نفهم ف البدايه ان اي علاقه ف الدنيا ليها هدفين ....الاولاني تحقيق الاحتياجات بكل انواعها ...و التاني الحصول علي السعاده والتوازن النفسي ، و نفهم كمان ان بعض الناس ممكن تكمل في علاقه بتحقق لها هدف واحد بس ، لكن كل الناس مش ممكن تواصل في علاقه مابتحققلهاش اي هدف الاتنين .
١-لما يسود الخرس العلاقه ومانسمعش ولا نفهم بعض وكل واحد مايسمعش غير صوت نفسه فتضيع الصداقه والتفاهم والود ونبقي اغراب في نفس المكان .
٢- لما يضيع الامان فمقدرش اتكلم معاه براحتي ولاعلي طبيعتي ولا حتي اثق فيه ودايما ابقي متوقع منه الغدر او هتك السر وساعتها بتظهر الامراض زي سوء الظن والتجسس بكل تباعتهم .
٣- لما يضيع الاحترام فتبقي العلاقه مبنيه علي التسفيه والاهانه والتوبيخ والتقليل .
٤- لما يضيع الغفران والتسامح فيبقي كل طرف بيتصيد للتاني اخطاءه ولا يمكن يسامحه ولا يغفرو مهما شافه بيندم او ينكسر .
٥- لما نكرر الخطأ ومانعترفش بيه ولا نعتذر عنده فنصيب الطرف التاني بالاحباط .
٦- لما تضيع المشاركه ويبقي لكل واحد حياه كامله منفصله عن التاني ونبتدي في تقسيم تركه الحياه من فلوس وولاد واماكن .
٧-لما تغيب الرؤيه المسقبله للعلاقه و كل حاجه تبقي وعود بدون خطوات او تنفيذ فنبقي عايشين خايفين من بكره.
٨- لما تضيع الرحمه من طرف من الاتنين فميحسش بوجيعه التاني سواء نفسيه او جسديه ويبتدي يتهمه بالدلع والمبالغه .
٩- لما طرف يعتاد العطاء ويخلص فيه وطرف تاني يكتفي بالأخذ ويعتبره حق مكتسب ، فيحصل الانفجار .
١٠- لما الكِبر والعناد والانتصار للذات يبقوا أهم من الحب والعشره هنا بالتحديد لازم تنتهي العلاقه .
بس طبعا مش معني كلامي اننا لما نلاقي عيب من العشره ننهي العلاقه !!! لا طبعا مافيش علاقه مافيهاش قصور لكن لازم قبل ماناخد القرار نسأل نفسنا كذا سؤال :
هل العيب ده بس اللي موجود ولا فيه عيوب تانيه وهل احنا قادرين نتعايش ولا فاض بينا وهل الطرف التاني فيه مميزات تانيه تغفرلو العيوب دي ولا ولا ؟
ليست هناك تعليقات:
إرسال تعليق