طبعا الكل هيسأل احنا هنعاقب اطفال التوحد ؟ ازاى تعالوا نشوف اولا يعنى ايه سلوك
سلوك يعنى مجموعه من التصرفات ال بتصدر عن الإنسان أو الكائن الحى عموما سواء كان السلوك دا مقبول أو غير مقبول
أما تعديل السلوك فهو إزاى تقوم أو تعدل السلوكيات الغير مقبول منها الى سلوكيات ايجابيه
والعقاب هنا مع اطفال الأوتيزم أو التوحد اسمه تعديل سلوك ياجماعه مش عقاب بالمعنى المفهوم بمعنى انا عندى طفل توحد عنده سلوكيات كتير جدا سيئه المطلوب انى اعدل السلوكيات دى لسلوكيات ايجابيه
والسلوك ياجماعه نوعين
سلوك مكتسب من الخارج او البيئه المحيطه عن طريق اكتسابه من افراد تانيه
وسلوك طبيعى أو خلقى موجود اصلا عند الطفل سواء بوراثه أو عن طريق مثلا اكتسابه من مواجهة ضغوطات من جانب المحيطين فظهر عنده
تعالو بقا نشوف إزاى نعاقب أو نعدل سلوكيات طفل التوحد أنواع الاستراتيجيات لتعديل السلوك كتيرة هحاول اختصرهالكم بأمثله موجزة لأنها محتاجه شرح كتير
أولا العقاب
ذكرناه قبل كدا فى موضوعنا قبل كدا لكن هنا بيختلف شوية
العقاب زى ماقلنا نوعين
ايجابى وسلبى
لكن مع طفل التوحد بتختلف شوية
الايجابى اننا بنعرض الطفل لمثير غير مرغوب فيه ومنفر ودا لا يستحب انك تستخدمه
لكن السلبى انك بتحرمه من حاجه هو بيحبها خروج او اى حاجه بالنسباله تكون مميزة
ثانيا الإقصاء
الإقصاء عندنا نوعين
إنك تبعده عن البيئه ال فيها معززات
أو إنك تسحب منه المعزز ال بيفضله بعد حدوث السلوك مباشرة
وهنا بأكد تانى لازم العقاب أو تعديل السلوك يبقا وقت حدوث السلوك مباشرة لأنه ببساطه بعدها مش هيعرف هو بيتعمل معاه كدا ليه
ثالثا التصحيح الزائد
ودا بقا اما يعمل سلوك معين وفيه ضرر معين يزيل الضرر دا ونكلفه بعمل معين يعنى مثلا ينضف حاجه او يشيل حاجه من مكان لمكان المهم ان ال عمله يصححه بنفسه
رابعا التشكيل
ودا بقا بنجعل الطفل فيه يكتسب سلوك جديد ايجابى مننا بنشكله ونعمله المثير احنا ونخليه يستجيب ويعمله
خامسا النمذجه
ودا بيبقا عبارة عن اننا نجعل الطفل يشاهد سلوك الأخرين بمشاهدة نموذج معين
سادسا ضبط المثير
ودا ممكن بتعديل أشياء محيطه بالطفل ودا ممكن يستخدم مع الطفل الروتينى بنغيرله دايما ترتيب الأشياء المحيطه ليه
سابعا الإطفاء
غالبا الإطفاء بيبقا فى السلوكيات ال بيبقا لها دعم فا لو وقفنا الدعم السلوك بيضعف ويختفى
وأوقات تجاهل السلوك يؤدى لإنطفاء السلوك
ثامنا التعزيز
التعزيز بيبقا ايجابى وسلبى
مثلا نستخدم معزز ايجابى للطفل يكون بيحبه بعد ظهور السلوك الايجابى للطفل مباشرة
التعزيز السلبى
اننا نزيل مثير غير مرغوب فيه أو مؤلم للطفل بعد حدوث السلوك المرغوب فيه مباشرة
طبعا فى اساليب كتير لتعديل السلوك لكن دا الشائع منها والأفضل فى تعديل السلوك لطفل التوحد
شيماء حجاج
ليست هناك تعليقات:
إرسال تعليق